Сонгуульд нэр дэвшигчдийн мэтгэлцээн өнөөдөр МҮОНРТ-ээр гарах товтой байсан ч цуцлагджээ. Энэ талаар МҮОНРТ-ийн зүгээс энэ талаар мэдээлэл хийлээ. Сонгуулийн сурталчилгаа 14 хоногийн хугацаанд үргэлжилж байгаатай холбоотойгоор сурталчилгааны хамгийн сүүлийн өдөр мэтгэлцээнийг зорхион байгуулахаар төлөвлөжээ. Мэтгэлцээнийг MNB сувгаар шууд дамжуулан үзүүлнэ, мэтгэлцээнтэй холбоотойгоор гурван нэр дэвшигчийн сурталчилгааны менежерүүдтэй гурван удаагийн уулзалт хийжээ. МУ-ын Ерөнхийлөгчийн мэтгэлцээн үндсэн таван сэдвийн хүрээнд явагдахөөр төлөвлөсөн аж. Ингэхдээ үндэсний аюулгүй байдал, шүүх засаглал, гадаад бодлого, улсын нийгэм эдийн засаг, батлан хамгаалах зэрэг сэдвийн хүрээнд 120 минутын хугацаанд явагдахаар төлөвлөжээ.
Төлөвлөгөө ёсоор нэр дэвшигч нар нээлтийн үг хэлэх, тайзан дээр зогсох дараалал, асуултад хариулах, дохионы хэлмэрч сонгох, хаалтын үг хэлэх гэсэн таван сугалаа сугалж оролцохоор байжээ. Дохионы дөрвөн хэлмэрч, нэг модератор оролцохоор төлөвлөжээ. Энэ мэтээр 150-160 орчим хүн оролцож, нийт бэлтгэл ажилд 60 орчим сая төгрөг зарлагджээ. Мэтгэлцээнийг зохион байгуулахад оролцох 190 орчим иргэнийг түргэвчилсэн шинжилгээнд хамруулсан байна.
Мэтгэлцээнд оролцох нэр дэвшигч Д.Энхбат коронавирусын халдвар авсан учраас мэтгэлцээнийг хэрхэн зохион байгуулах төлөвлөгөөнд өөрчлөлт оржээ. Тодруулбал, ХҮН-аас нэр дэвшигч Д.Энхбатыг халдвар хамгааллын дэглэмийг сахиулж, студид авчрах, хоёр нэр дэвшигчийг студиэс Д.Энхбатыг эмнэлгээс явуулын студиэс оролцуулах, эсвэл гурван нэр дэвшигчийг гурвууланг нь эмнэлгээс оролцуулах гэсэн гурван хувилбар гаргажээ.
Гурван намын зүгээс бүгд мэтгэлцээнд оролцох хүсэлтээ байгаагаа мэдэгдсэн байна.
Д.Энхбатын хэвтэн эмчлүүлж байгаа Улсын Хоёрдугаар эмнэлгийн зүгээс “халдварын Улаан бүс рүү гаднаас хүн оруулахгүй, мөн өвдсөн иргэнийг гадагш гаргах боломжгүй” гэсэн хариуг ирүүлжээ. Мөн Төрийн тусгай хамгаалалтын албанаас “Нэр дэвшигчдийг оролцуулах боломжгүй” гэсэн хариу ирүүлжээ.
Тиймээс нэр дэвшигчдийн мэтгэлцээнийг зохион байгуулах боломжгүй боллоо хэмээн мэдэгдлээ.
Мэдээнд сэтгэгдэл үлдээх