Ковид19 цар тахлыг хяналтгүй орхивол юу болохыг одоо Бразилаас харж болохоор болжээ. Цар тахал анх дэгдэж байхад хариу үйлдэл хамгийн багатай улс нь Бразил байсан. Тус улсын Ерөнхийлөгч Жаир Болсонару нь амны хаалт зүүхээс татгалзаж, иргэд нь цар тахлын вакцин хийлгэхгүй хэмээн жагсаж цуглаж байлаа. Үүний улмаас өвчний тархалт газар авч, ширэнгэн ойн дунд нуугдмал орших Манаус хотод иргэд үй олноороо амиа алджээ. Нас барсан иргэдийг бөөнөөр нь нэг дор оршуулж буй бичлэг жилийн өмнө интернэтээр цацагдан дэлхий нийтийг айдас түгшүүрт автуулж байсныг сануулах юун. Тэгвэл одоо энэ дүр зургийг ганц Манаус биш, тус улсын бүх л хотоос харж болохоор болжээ. Өвчний тархалт хяналтаас нэгэнт гарч, өдөрт дунджаар 4000 хүн энэ өвчний улмаас нас барж байна.
Жилийн турш ямар ч хяналтгүй явсны улмаас вирусийн тархалт асар хурдацтай нэмэгдэж, нас барсан хүний тоо 300 000-д дөхжээ. Өнгөрсөн пүрэв гаригт ганцхан хоногт 4247 хүн нас барсан нь нэг хоногт нэг улсад нас барсан дээд үзүүлэлт болоод байна. Өмнөд Америкийн энэ улс өдгөө цар тахлын хамгийн том, хамгийн идэвхтэй голомт болж хоцроод байгаа бөгөөд энэ сарын сүүл гэхэд өдөрт 5000 хүн нас барна гэсэн тооцоог мэргэжлийн байгууллагууд танилцуулж байгаа юм.
Бразилийн энэ хайнга байдал дэлхий нийтийн санааг зовоох болсны учир нь манай гаригийн хамгийн олон амьтны төрөл зүйл тархан нутагладаг Амазонкийн мөнх ногоон шугуйтай холбоотой юм. Ийм газар оронд вирус чөлөөтэй тархвал мутацид орж, яваандаа илүү аюултай шинэ төрлийн вирус үүсэх магадлалтай юм.
Байдал ийм эгзэгтэй байгаа ч тус улсын эрх баригчид, ялангуяа Ерөнхийлөгч Болсонару тусгаарлалтын дэглэмээс татгалзсаар байгаа юм.
Мэдээнд сэтгэгдэл үлдээх