“Халбага” нэрээ “Нисдэг” болгосон Б.Пүрэвдорж гишүүнээ хүн таараагүй нь аз шүү

УИХ-ын гишүүн Б.Пүрэдворжийн биеийн байдал хүндхэн байгаа талаар эх сурвалжууд хэлж байна. Тэрбээр дөрөвдүгээр сарын 18-ны согтуугаар машин жолоодож, улмаар ноцтой осол гаргаж, өөрөө ГССҮТ-д хүргэгдсэн талаар мэдээлэл олон нийтийн сүлжээгээр тарсан.
Тодруулбал, тухайн өдрийн 22:55 цагийн үед мань гишүүн Nissan Teana маркийн авто машиныг согтуугаар жолоодож яваад Хан-Уул дүүргийн 2 дугаар хорооны нутаг дэвсгэр Чингисийн өргөн чөлөө АПУ компанийн арын замд хөдөлгөөнд оролцож явсан авто машины толийг шүргээд, цаашлахдаа замын хажуугийн хайс, хашлагыг мөргөсөн ноцтой осол гаргасан. Харин тухайн зам тээврийн ослыг Хан-Уул дүүрэг дэх Цагдаагийн газрын Замын цагдаагийн хэлтэст шалгаж байгаа бөгөөд түүний согтолтын зэргийг драйгер багажаар шалгахад 1.31 хувийн согтолттой гарсан байна. Мөн цуснаас нь дээж авч Шүүх шинжилгээний үндэсний хүрээлэнд тогтоолын хамт хүргүүлээд байгаа юм.
Харин өчигдөр мань гишүүн Б.Пүрэвдоржийн ноцтой ослын бичлэг олон нийтийн сүлжээгээр тарж ил боллоо. Бичлэгийг үзсэн амтай болгон замд нь хүн таараагүй нь гэж дуу алдаж байна. Эрхэм гишүүн согтуугаар жолоо барьж, хатуу хөл хорионы дэглэм зөрчиж, бас болоогүй НОЦ-той осол гаргав. Хууль дүрэм, журмыг биелүүлж нийгэмд зөв үлгэр дуурайлал үзүүлэх хүн атал эсэргээрээ ийм болчимгүй үйлдэл гаргаж нийгмийг цочроолоо.
Түүгээр ч зогсохгүй түүний энэ үйлдлийг цагдаагийн байгууллагынхан ихэд нууцалж, жолоо барьж явсан хүний тухай хэлэх боломжгүй гэх тайлбарыг өгсөн нь энгийн иргэн, эрхэм гишүүний ялгаа хуулийн өмнө хэр өөр үйлчилж байгааг ч давхар харуулж, олны бухимдлыг төрүүлж байна.
Цагдаагийн байгууллагынхан аливаа ослын газрыг олон нийтэд фото болон видео байдлаар түмэнд түгээу сэрэмжлүүлдэг. Харин энэ удаа бол ихэд нууцлахыг хичээсэн
Гэвч нөгөө талаар УИХ-ын гишүүн хүн хатуу хөл хорио, халдвар хамгааллын дэглэм зөрчиж, согтуугаар тээврийн хэрэгсэл жолоодож, осол гаргасан нь хуулиар, дархан эрх гэгчээр хэнийг хэрхэн хамгаалж байна вэ гэдгийг эргэн харах шаардлагатайг анхааруулсан үйлдэл болж байна.
Нутгийн иргэдээ төлөөлж төрд байгаа хүн нэгэнт хэд хэдэн хууль, дүрэм зөрчсөн нь ил болсон тул одоо ядаж зөв үлгэрлэл харуулаад ард түмнийг төлөөлөх эрхээсээ татгалзах нь зүйтэй. Аливаа зүйлд хэмжээ хязгаар, хариуцлага гэж бий. Иймд эрхэм гишүүнд ёс зүй, хариуцлагаа ухамсарладаг жишиг хэзээ тогтох бол…